38 —¡Pisaikajeite! Meka Director isampitakeri bametinkari: —¿Piyotakekea janinka obameniteri iyosanotatsiri pobametantika? ¿Pantajeitakerompa antaberentsi semanatakotatsiri namenantabakearori? —Je, Director nantajeitakero —inkantanake bametinkari—. Obakeranenta intsonkajeitakero. Anakotaintsiri nota iri akerori Humberto Grieve. —¿Jaokakea meka yantabere? —Jeroka Director, yantabere. Yamenanakero bametinkari iro onkonoayetakara antaberentsipe yantayetakeri obameniteripe ari iñajiro antaberentsi osankinatakota ibajiro Humberto Grieve. Impitari Director, ari yamenanakero osami antaberentsira. —Aribe kametsa —inkantanake Director, inkimoshiretanake. Yantaitita sankenamentotsiki impoiji ari yamenamintsajeitakeri obameniteripe. Impoiji ishintsitanake iñabetanake tsamesanonenta: —Pantajeitakerira antaberentsi, mekaya kametsaperotaintsiri irointi irashi Humberto Grieve. Meka osankinatakotya ibajiro ara Monkarakira Yotakantatsiri anakotantatsiri semanaki, isankenatakotya obameniteri anakotantaintsiri berachari intarori yotaneri. Pisokijanake Humberto Grieve. Marojeini jananeki yamenajeitanakeri Humberto Grieve, ishitobanake ishemetake inkatimotaitaparo isankenamentote bametinkari. Yabakotakeri Director ari inkatiri: —Aribe, Humberto Grieve. Nobetsatimpi. Ari inkantajeityarime marojeini jananekipe. Kametsatake. Impitsokanaja Director ari yamenajeitiri obameniteripe impoiji inkantajeitiri: —Ari pinkemejeityarime marojeini pishiyempari Humberto Grieve. Pishiyempari inkametsati iyosanoti. Papipininterome yobameyetimpiri pikemetantyariri. Pinkametsajeite katsini, inkemetara jananeki iyosanoti. Aririka pishiyajeityari, ari pajeitake aparope kimoshiretakayempiri ontsonkanakearika osarentsi aisati ari osankinatakotakia pobajiro ara Monkarakira Yotakantatsiri ashi Yotantsipanko, kemetakakarori irashi Humberto Grieve. Amenabaketa pokapajatsine semanaki, ariyata intimaje pashini obameniteripe bametantatsine inkantayetirori antaberentsipe, kemetarori yantakeri Humberto Grieve. Iro noyakotiri.
RkJQdWJsaXNoZXIy MjgwMjMx