35 Yaitanajiro Humberto Grieve obametantsiki maroni yamakopinintiri Paco Yunque ari yobapajiniri iyaripetateki. Impoiji, impiyaitanaja saiterikira iñatsatakapajari Paco Yunque. Ari yajirikatsanotapakeri aisati itaporiakakeri itsakiki impoiji inkamatsatakakeri. —Eiroya pishebatasti —inkantamintsatakeri—. Poyabaketa nonkantempi. Inkenaitanake antamaji Humberto Grieve impoiji ishiyashitakari yanonkoriapairi Paco Yunque yoyotakara, yajirikapakeri itapiki impoiji yatikamintsatakeri. Impiyaitanaja yanonkoriajiri Paco Yunque, aisati yapitajiri yatikamintsatiri. Osamani iñatsatakakari Humberto Grieve Paco Yunque. Onkaratake pitetsa anonkoriantsi aisati pitetsa atikamintsatantsi. Inkemaitabake iranainchari. Iri Yunque iranaichari onkatsitimotanakeri yatikamintsatakerira Humberto. Ishitobitanaka Paco Fariña itiyontabetakara itsipabeitarini jananekipe ari ikatimotapakari Grieve, ikantapairi: —¡Eiro! ¡Eiro noshinetajimpitsi panonkoriajeri Paco Yunque! Yakanakeritya Humberto Grieve yasarimatanakari: —¡Pinkeme! ¡Pinkeme! ¡Paco Fariña! ¡Paco Fariña! ¡Nonkaposatyempiya! Iritya Fariña te ishebatyaji ari ikatimotapari yameniri Grieve inkantapairi: —¡Patsananaitetakari pimperanare, pantabetiri aisati panonkoriabetiri impoiji pimirairi! ¡Panonkorianaiteri ariya piñakotakea! Apiteroiteni Zumiga yabitsanotapakeri Paco Yunque ari inkantajeitiri pimajirete eiro piratsi, inkantajirikea: —¿Paitampa pishinetantariri yanonkoriempi aisati yatikempi? ¡Panteri! ¡Panonkoreri abirori! ¿Paita pishinetantari? ¡Eiro pimasontititsi! ¡Pimajirete! ¡Eiro piratsi! ¡Irotakeña ajataje abankokipe! Irapinibetacha Paco Yunque aisati akeri ishenka. Yapatibentajeitanakari jananekipe yapatibentari Paco Yunque, Humberto Grieve aisati Paco Fariña. Intatsinkakeri Grieve yora Fariña ari ibariyapakeri. Inkenapake kimotataintsiri obameniteripe, berainchari apitetirori yotaneri, ari inkisakotapari Fariña, yatikitapari Grieve. Pashini jananeki berainchari mabatirori yotaneri, kimotaperotaintsiri anakotantatsiri maroni, inkisakotapakari Grieve, iri kaposapakeriri obameniteri berainchari apitetirori yotaneri. Osamani okantaka impasaborotabakajeitaka aisati yatikabakajeitaka osheki obameniteripe. Antsikoitani inkantajeitanaka.
RkJQdWJsaXNoZXIy MjgwMjMx