27 —¡Icheya, bametinkari! —yakanake Humberto Grieve—. Icheya Paco Yunque, tempa irotake omperanaro inajeni aisati te ontime oirekite. Yajirikanakero bametinkari tiza, ari itapimotanakari jananeki isankenati pisaraki. Humberto Grieve, tera yameneri bametinkari, ari inkatiyanaka intsipaini itimpaishitiri Yunque, ishiyaitanaja isaikapaji iyaripetateki. Ari iranaka Yunque. —¿Paitampa ara? —inkanti bamentinkari, impitsokanaka yameni abishimotaitsirira. Inkantanake Paco Fariña: —Itimpaishitakeri Grieve, bametinkari. —Teya, bametinkari —ari inkanti Grieve—. Teña notimpaishiteriji. Irosati nosaikaiti te noshebatyaji. —¡Aribe, aribe! —inkanti bametinkari—. ¡Pisantikojeite! ¡Pimajirete, Paco Yunque! ¡Pisantikojeite! Irosati isankenati pisaraki; impoiji isampitakeri Grieve: —Aririka amisokijakeri inkiajatira nijaki, ¿paita abishimoterine shima? —Ari isaikapajeri napatiyamentoki —yakanake Grieve. Aisati jananekipe ishirontibentajeitajari Grieve. Tetemi iyoteji Grieve. Iro impampitsashireakotari iriori ibanko jero yapatiyamento aisati inkenkishireakotari iriri impoiji irekite. Inkantapininta inkantashibetya paitaperika. —Mekakea nosampitempi, abiro, Paco Yunque —inkantiri bametinkari—. ¿Paita abishimoterine shima, aririka aimisokijakeri inkiajatira nijaki? Iri Paco Yunque, iranentaka intimpaishitakerira Grieve, yapitajiro maroni inkantayetakeri bametinkari: —Inkamajeiti shimape eirorika ontimimotanajiri nija irotakeña binenkakairiri. —¡Aiteitake! —inkantiri bametinkari—. Aribe kametsa. Impiyanaja isankenataji pisaraki. Impitsokanajara bametinkari yora Humberto Grieve ijatashitakeri inkaposhiri Paco Fariña ibantekira ari impiyaitanaja intsipaini iyaripetateki. Iri Fariña, te ishiyakotyari Paco Yunque imajerepitsatari irara, inkajemanake irinti inkamantiri bametinkari: —¡Bametinkari! ¡Yantanataityana Humberto Grieve!
RkJQdWJsaXNoZXIy MjgwMjMx