25 Yakajeitanake marojeini jananekipe: —...aimisokijakeririka eirorika otimimotanajiri nija. —Ariteitake —ari inkanti bametinkari. Irikea jananeki tonkinti aisati kiteshibari inkantanake: —Tempa timatsi irinirope nijakinta aririka aimisokijakeri, eiro intimanajitsi irinirope. —¡Te, te, te! —inkanti bametinkari—. Inkamajeiti shimape eirorika intimakotanaji nija, eiro imatanaja ibinenkanaje. Ari ibinenkajeitari nijaki, aririka isokijake, eiro ontimimotanajiritsi binenkantsi. —Kamabintsaitanakete —inkanti aparo jananeki. Ari Inkanti Humberto Grieve: —Ari impakeri apajeni binenkakayerine ara nobankokinta, itimiñakea osheki irekite ari yamanantakero maroni inkobayetiri. Jananeki kitsatakarori kenashiri ari inkanti: —Aisati apajeni intimi irekite. —Aisati apajeni —inkantanake pashini jananeki. Inkantajeitanake maroni jananekipe aisati apajeni intimi osheki irekite. Tekatsi inkante Paco Yunque irinti impampitsashireakotari shimape kamayetatsiri eirorika intimakotanaji nija. Irikea Fariña inkantiri Paco Yunque: —Ñatya abiro ¿Tempa intime irekite piri? Ari impampitsashireanaka Paco Yunque impoiji inkenkishireanaka iñakotakero iriniro ajirikiri akoki oirekite. Inkantiri Yunque yora Fariña: —Aisati inajeni timatsi osheki oirekite. —¿Jaoka inkaratikea? —Isampitakeri Fariña. —Inkarati otsi itsokite kireki. Iñabetanake Fariña shintsini inkantiri bametinkari: —Inkanti Paco Yunque aisati iriniro timatsi osheki oirekite.
RkJQdWJsaXNoZXIy MjgwMjMx