17 Yakanakeri, Humberto, ikisanentakara: —Nomamanaitiña. —Ariompa —inkantiri bametinkari—. Te nonkobajeji papipinintajero paretapinintya osamani. Pabisape pisaike. Inkobapakeri Humberto Grieve jaka isaikapairi Paco Yunque. Iñitarikea, ikempejimotapakari ari inkantapairi: —Kate noyaripetateki atsipatabakayempata. Irikea Paco Fariña yakanakeri Humberto Grieve: —Eiro. Aitakeña yoimisaikapaintiriri obametantatsiri aka. —¿Abirompa nokanti? —ari inkantanakeri Grieve inkisatsatanakeri, yakatsabakoyetanakeri Yunque yanakeri iyaripetateki. —Kajemanake Fariña —¡Bametinkari!, yayetanajiriya Paco Yunque ara iyaripetateki Grieve. Ibashiyantanakero bametinkari isankinare impoiji yatsimakarira ari isampitiri: —¡Amenabakerotate! ¡Pimajerete! ¿Paita abishimotaintsiri? Yapitaji Fariña inkanti: —Yayetanajiri Paco Yunque ara iyaripetateki Grieve. Yoimisaikakerira Paco Yunque, iyaripetateki Humberto Grieve, ari inkantiri bametinkari: —Je, aitake naitiri. Iritakeña nomperanari Paco Yunque. Irotake namantakariri. Iyobetakaña bametinkari impoiji ari inkantiri Humberto Grieve: —Kametsabetaka. Iro kantaincha naro oimisaikakeriri isaikinta Paco Fariña, inkemasanotantyarori bametantsipe. Pishineteri impiyanajeta isaikaitinta. Maroni obameneteripe santikoiteni ari yamenajeitanakeri bametinkari, Humberto Grieve jeri Paco Yunque. Ijatitanaka Fariña yajirikabakotapakeri Paco Yunque inkoabeta yoipiyajeri iyaripetateki, irikea Grieve ajirikabakeriri pashiniki irako impoiji te ishineteri ishebatya.
RkJQdWJsaXNoZXIy MjgwMjMx