15 Te yakejikea Paco Yunque. Pashinira Paco aikero yoitari. Nama aitake inkemejeitariri pashinipe jananeki: ñabejeitinkaripe, kimoshirejeitinkari te intsarobakayemparo yotantsipanko. ¿Aitakempa inkantajeitari? Irikea, Paco Yunque, ¿paitampa intsarobantari katsini? Yamenapinintakeri bametinkari intsarobakanentakari, yamenamintsatiro isankenamentote, tantotsipe itapitakarira bametinkari jero otabantote. Yamenasheatakero, bentanaki, iñakero osaiteritakera, tekatsira saikanajatsine onkantanaka santikoiteni. Oreabetacha. Imajerejeibetapanajanta, inkemajeitiri ñabejeitatsiri kiatsiri pashini obametantsiki aisati inkemiro anitakairori carretas abisatiri kayekinta. ¡Arimpa onkantabetari yotantsipankoki pashiniteitake! Obakera iyoshireabetanaka Paco Yunque. Ishiretakotanakaro ibanko aisati iriniro. Ari isampitiri Paco Fariña: —¿Jakampa inkarate ajataje abankoki? —Iberapakearika tsapani orea. ¿Jaokampa pisaikiri? —Antoo. —¿Arejimpa? —Je… Teña… Te iyotero Paco Yunque obajiro yaretantajeari ibankoki. Obakerara yaretakotapa, imakotapakero kapicha kitaiteri, isaikaitatira irobaneki inkomitapakaro poiboro. Inkemabake shiyapachari saiterikira, inkonijatapake Humberto ashitakomentotsikira obametantsiki, tomintariri Dorian Grieve, irinti kirinko, ibatorote Yunque, iri amenakobentirori onkenakotinta tren jitachari «Peruvian Corporation» irisati alcalde jebabentirori nampitsi. Irotake yametantakariri Paco itsipamintsatantyariri Humberto ijatanteari yotantsipankoki aisati iñatsatakantyariri, imonkarabaka irosarentsite. Yamepinintaro Humberto yaretapininta osamaninenti yotantsipankoki irokea, obakera intya obametantsi, iriniro Grieve onkantiro iriniro Paco: —Pijatakayeri Paco yotantsipankokinta. Te onkanteji yaretya osamanitanakerika obametantsiki obakera intaro kitaiteri. Osaitekeratya yoiyabaityeri Humberto intinaye impoiji abiro ayerine apiteroiteni. Bametinkarira, iñabakeri Humberto Grieve, ari inkantiri: —¿Aisatimpa aretamanajampi osamani?
RkJQdWJsaXNoZXIy MjgwMjMx