41 Ari imajiretanake Director. Maroni obameniteripe impampitsashireanaka ari yaminajeitiri Humberto Grieve. ¡Aribe Grieve! ¡Kametsa pisankinatakeri antaberentsira! ¡Irotake kametsataintsiri! ¡Iri anakotaintsiri maroni obameniteripe! ¡Yarepinibeta osamani! ¡Antantinkari inati! ¡Yamenajeibetakari! ¡Ipabakotakerira Director! ¡Iri anakotaintsiri Humberto Grieve, iyoperosanoti yanakotakeri berainchari intarori yotaneri! Ari Director ibetsatanajari bametinkari, ipasonkitanajiri obameniteripe, inkatiyajeitanaja ijatanajira, ari ishitobaitanaji. Impoiji inkanti bametinkari: —¡Pisaikajeite! Intsitonkajeitanakaro iyaripetatepe isaikajeitantanakari maroni obameniteripe. Yora bametinkari inkantiri Grieve: —Pijate pisaikapaje. Kimoshireitanake, Humberto Grieve, impiyaitanaja iyaripetateki. Yabishimotanajirira Paco Fariña, ari yoinijanakeri inene. Ari inkenaitanaji bametinkari isankenamentoteki impoiji isankenatapaji iribiroteki. Inetsikeaji iñabetiri Paco Fariña yora Paco Yunque: —Pameneri bametinkari, isankenatakotatiro pibajiro ara iribiroteki, tera pimperiji pantabere. ¡Pamenerite! Eiroya meka ishinetimpi pijataje pibankoki ari yoimisaikabakempi. ¿Paitakea pisarantakarori pisankenarepana? ¿Jaokampa pobabetanakarori? Te yakeji Paco Yunque irosati yoiyotaka. —¡Pinkante! —yapibetajari inkantiri Paco Fariña—. ¡Pakekite! ¿Paitampa kari pakanta? ¿Jaoka pijokanakerori pantabere? Ari yoiyotanaka Paco Fariña yameniri Paco Yunque iñatiri iranaka. Ari intakotanakari, inkantirikea: —¡Pipeakotyaro! ¡Eiro piratsi! ¡Pipeakotyaro! ¡Eiro pobashireta! ¡Tsame añatsatyaro nokashiyamento! ¡Ontimakoti torres kisaripe! ¡Pimpeakotyaro! ¡Ari nompakempiro nonkashiyamento! ¡Eiro pimasontititsi! ¡Eiro pirajatsi! Irosati ira Paco Yunque yoiyotanakara.
RkJQdWJsaXNoZXIy MjgwMjMx